頭一擺牚腿
作者：温鳳瑜
咱人通常較會記得頭一擺的代誌，頭一擺的經驗嘛會影響咱未來處理代誌的態度佮方法。我食甲欲四十矣，有一寡仔頭一擺的經驗，有的想起來閣誠趣味，有的這馬想著猶原誠驚惶。
細漢的時，頭一擺牚腿的經驗是佮阿母去送報紙，彼是我國小歇熱的時陣。頭起先我想講阿母欲??我佮阿兄去??迌，尾仔才知影代誌毋是按呢。阿母先??阮去囥報紙的所在，共廣告紙楔入去報紙內底，紲落來就根據無仝的路線來分配報紙。
啊是按怎會牚腿咧？這著愛對九份仔的地形講起。九份仔是一个坐山向海的山城，打馬膠厝起佇山崙頂，街仔路大部份是趨趨斜斜，樓梯坎仔誠濟。欲完成送報紙這項工課著愛一直爬來爬去，所以頭一擺送報紙轉到厝，我佮阿兄就牚腿矣。阿母講予阮兩兄妹仔訓練一下，當做阮歇熱的運動。起頭阿母先??阮行幾擺仔，予阮知影這條路線內底佗一間有訂報紙，順紲教阮按怎共報紙顧予媠媠毋通拗著，楔入去人客的厝裡，閣愛注意袂使予報紙澹去。其實大部份的報紙猶是阿母咧走咧送，我佮阿兄干焦行固定的路線。
送報紙這个體驗予阮兄妹仔了解阿母的工課，嘛體會著這項工課的辛苦，而且予阮知影每一項工課攏有伊的鋩角，會使要求家己做予閣較好。阿母做送報紙這途強欲十年，有一改發生意外，阿母的大頭拇去予狗仔咬斷，好佳哉後來有接轉去。只要報社有出報紙，就算講透風落雨嘛愛出門送報紙。這項工課阿母一直做甲阿爸共西裝店轉型做藝品店了後，才共金九地區的經營權交予別人。
拄著代誌的時，若我頭一擺的經驗誠好，紲落來拄著相同的，我就會用較輕鬆的態度來面對。若頭一擺的經驗無好，代誌閣來，心情就會較緊張，驚去犯著仝款的錯誤，會用較細膩、較斟酌的心態來處理。我才欲四十歲爾，閣有誠濟機會會拄著各種代誌的頭一擺，累積各種無仝的經驗。向望未來佇頭一擺的經驗內底，會使學著需要的智識佮得著寶貴的啟示。
☆詞彙學習☆
thènn-thuí/thìnn-thuí：又唸作thì-thuí。因為劇烈運動而導致腿部肌肉酸疼。
seh：把東西塞進孔縫內。
tá-má-ka：又唸作tiám-má-ka。柏油。
suann-lūn：指地勢較一般平原為高的小山丘。
khám-á：又唸作gám-á。地面上突起的小臺階。
áu：摺、折。
mê-kak：比喻事物細小而且緊要的部分。
tuā-thau-bú：又唸作tuā-thau-bó。大拇指。
预览时标签不可点收录于话题#个上一篇下一篇转载请注明：http://www.baozhijieshao.com/nrsj/13719.html
